News

प्रेमिकालाइ भेट्न मन लागेपछि खोला तरेर पार गर्न खोज्दा २४ वर्षीय अरुण बेपत्ता

विराटनगर : मोरङको रतुवामाई नगरपालिका-७ डाँगीटोलका २४ वर्षीय अरुण ऋषिदेव आइतबार आफ्नी प्रेमीकालाई भेट्न झापाको गौरीगञ्ज जाँदै थिए । प्रेमीकाले भेट्ने इच्छा व्यक्त गरेपछि मामा बासु ऋषिदेवलाई साथमै लिएर उनी घरबाट आइतबार साँझतिर निस्किए । प्रहरीकाअनुसार घुमेर जान निक्कै समय लाग्ने भएकाले अरुण र बासुले बाढीका कारण उर्लिएको रतुवा खोला तरेर जाने निर्णय गरे । खोला तर्नका लागि वरपर कुनै पुल वा अरु केही माध्यम नभएपछि उनीहरुसँग पौडिएर खोला तर्नुको विकल्प थिएन ।

पौडिएर तर्ने योजना बनाएका दुवैजना खोलामा हाम फाले । जसोतसो पौडिएर खोला तर्दै बासु गौरीगञ्ज निस्कन सफल भए । तर उनीसँगै खोलामा हाम फालेका भान्जा अरुण भने निस्किएनन् । उनलाई खोलाले बगाएर बेपत्ता बनायो । आफन्त, स्थानीय बासिन्दा, नेपाल र सशस्त्र प्रहरीले खोजी जारी राखे पनि उनलाई फेला पार्न सकेका छैनन् । खोलाले बगाएको लामो समय भइसकेकाले जीवितै भेट्ने सम्भावना सकिएको प्रहरीको भनाइ छ ।

इलाका प्रहरी कार्यालय सिजुवाका प्रहरी निरीक्षक मोहन रायमाझीले प्रेमीका भेट्न निक्‍कै ठूलो जोखिम मोलेका अरुणलाई रतुवा खोलाले बगाएर बेपत्ता बनाएको बताए । खोला तरेर बाँच्न सफल भएका मामाले भान्जालाई प्रेमीकाले भेट्न बोलाएपछि आफूहरु गौरीगञ्जतर्फ लागेको जानकारी दिएको रायमाझीको भनाइ छ । उनकाअनुसार मामा बासुले गौरीगञ्ज पुगेर प्रहरीलाई खबर गरेपछि मात्रै घटनाका बारेमा थाहा भएको थियो ।

हुलाकी राजमार्गअन्तर्गत गौरीगञ्ज-विराटनगर सडक खण्डको निर्माणाधिन पुलदेखि करिब दुई सय मिटर दक्षिणबाट अरुणलाई खोलाले बगाएको प्रहरीले जनाएको छ । प्रहरीकाअनुसार निर्माणाधिन अवस्थाको पुलबाट जान सम्भव थिएन ।

मोरङ प्रहरी प्रमुख एसपी सन्तोश खड्काले प्रेमीकालाई भेट्ने नाममा जोखिमपूर्ण र लापरबाहीपूर्ण तरिकाले खोला तर्न खोज्दा घटना भएको बताए । ‘वर्खाका बेला बाढी आएर खोलानाला उर्लिएका छन् । ज्यानलाई जोखिममा राखेर लापरबाहीपूर्ण तरिकाले यसरी जोकोहीले पनि खोला तर्न हुँदैन,’ उनले भने, ‘बरु समय लागे पनि सुरक्षित बाटो खोज्नुपर्छ । त्यसो गरिएमा ज्यान बच्छ र कुनै क्षति हुन पाउँदैन ।’

एसपी खड्काले वर्खाको समयमा सावधानी अपनाउँदै सुरक्षित बाटोको खोजी गरेर खोलानदी तर्न सबैमा आग्रह गरे । ‘अरुणले पनि गौरीगञ्ज पुग्न सुरक्षित बाटो अपनाएको भए ज्यान बच्ने थियो,’ उनले भने, ‘चाँडो गरेर पुग्न खोज्दा ठूलो दुर्घटना हुन पुग्यो ।’ उनले कतिपय मानिसहरुलाई यसरीनै लापरबाहीपूर्ण तरिकाले खोलानदी तर्न खोज्दा बाढीले बगाएको जानकारी दिए । यस घटनापछि कोही कसैलाई पनि तर्न नदिन खोला आसपासमा निगरानी बढाइएको एसपी खड्काको भनाइ छ । अन्नपूर्ण

Related Articles

Back to top button
Close